El Comité Executivu del Conseyu de Mocedá de Xixón (CMX) decidió, viendo les condiciones económiques de la entidá, presentar énte la Dirección Xeneral de Trabayu un Espediente de Regulación d'Empléu (ERE) a les sos trabayadores. Según espliquen nuna nota de prensa, los presupuestos municipales supunxeron una mengua de más del 60% de la financiación del CMX, nuna decisión que califiquen d'«unilateral» y que «compromete la viabilidá económica y el caltenimientu de los puestos de trabayu».
Nestes circunstancies, el Comité Executivu «vese obligáu» a aprobar un ERE de suspensión temporal de los contratos de trabayu de les tres trabayadores del CMX -«aceptáu voluntariamente poles afectaes», según espliquen-, midida cola que se van aforrar 23.821,14 euros. Les asociaciones que formen el CMX quieren agradecer a les trabayadores del CMX la so «disposición y compresión énte la situación tan difícil que ta travesando».
Con esta midida asegúrase la viabilidá económica del CMX y el caltenimientu de los puestos de trabayu pal añu 2012. Amás, pela primer vez, nin el presidente del CMX nin nengún miembru de la Comisión Permanente va tar lliberáu, polo que nun va suponer nengún costu a la entidá. El Comité Executivu píde-y al Conceyu de Xixón qu'axuste pal añu 2013 un presupuestu que garantice la continuidá de l'actividá del CMX, pa lo que ye «imprescindible» caltener los puestos de trabayu actuales.
