Agenda de actividades

La Conceyalía de Cultura de Xixón convoca por primer vez el Premiu  de novela curtia Andrés Solar. El plazu de presentación  acaba'l día 17 de setiembre.

Bases del Concurso:

 1) Van poder optar al "PREMIU DE NOVELA CURTIA ANDRÉS SOLAR SANTURIO" les obres inédites escrites en llingua asturiana que nun se premiaren enantes en nengún otru concursu. Los y les autores van responder de l'autoría y orixinalidá de la novela que presenten al premiu y de que nun ye copia nin modificación d'obra ayena.

2) Les obres habrán tener una estensión mínima de 90 páxines y una estensión máxima de 150 páxines. Habrán presentase en DIN A4 (210 x 297 mm.) mecanografiaes a doble espaciu per una cara y cuerpu de lletra Times New Roman 12 o asemeyáu.

3) Les obres presentaes han tar escrites acordies coles normes ortográfiques de l'Academia de la Llingua Asturiana. De nun se cumplir esti requisitu, nun van tener opción a premiu.

4) La presentación d'orixinales va poder facese de dos maneres:

• A. Al traviés d'Internet. Cumplimentando, na Oficina Virtual del Conceyu de Xixón (cutt.ly/Qbx2Naz) el formulariu correspondiente y axuntando nél l'orixinal en formatu electrónicu (pdf, doc) y los datos personales -nome, apellíos, señes y teléfonu- tamién en formatu electrónicu (pdf, doc). N'unviando'l formulariu telemáticu, la Oficina Virtual devuelve un comprobante acreitativu, cola fecha y hora de presentación.
• B. Per corréu postal: van remitise 2 sobres nos qu'ha venir el nome del premiu "PREMIU DE NOVELA CURTIA ANDRÉS SOLAR SANTURIO", y tamién el títulu de la obra y el nomatu del autor o autora. Cada sobre ha contener:
  
    Sobre A: datos del autor o autora (nome y apellíos, señes y teléfonu)
    Sobre B: Orixinal y 3 copies del testu.
  
  

A estes señes:
Rexistru de la Fundación Municipal de Cultura, Educación y Universidá Popular
C/ Xovellanos, 21
33201 Xixón - Asturies

5) El plazu de presentación d'orixinales entama al día siguiente de la publicación d'estes bases nel BOPA y remata'l 26 de setiembre de 2021, Día européu de les llingües, almitiéndose, sicasí, los que tengan matasellos de correos d'esi mesmu día.

6) El xuráu, compuestu por persones venceyaes al mundu de les lletres asturianes, va designalu la Conceyalía Delegada de Cultura del Conceyu de Xixón. Va actuar como Secretaria la Responsable de la Oficina de
Normalización Llingüística del Conceyu de Xixón. La so composición va dase a conocer cuando se produza'l fallu, que va facese públicu n'avientu de 2021 (coincidiendo col cabu d'añu d'Andrés Solar Santurio) y la so decisión va ser inapelable.

7) El premiu podrá declarase ermu si'l xuráu considera que la calidá de les obres asina lo aconseya.

8) La cuantía del "PREMIU DE NOVELA CURTIA ANDRÉS SOLAR" ye de 3.000 €, aportaos pol Conceyu de Xixón pa la obra que por unanimidá o nel so defeutu, pola mayoría de los votos del xuráu, tenga los méritos mayores. Esta cantidá va llevar una retención de 15% en conceutu de tributos al Estáu. Esta cantidá nun va suponer en nengún casu la cesión o limitación de los derechos de propiedá de la obra premiada, incluyíos los derivaos de la propiedá intelectual.

9) El Conceyu de Xixón resérvase'l derechu de publicar n'esclusiva la primer edición de la obra premiada, dando por retribuyíos col premiu los derechos d'autor d'esta primer edición.

10) Los orixinales presentaos al concursu van devolvese si l'autor o autora lo solicita nos dos meses siguientes al fallu del xuráu. Les obres que nun se reclamen per escrito primero del 28 de febreru de 2022 y col xustificante de la Oficina virtual o de Correos qu'acreite l'autoría van destruyise.

11) La convocatoria del premiu va facese al traviés del BOPA y de la páxina web del conceyu de Xixón y n'otres publicaciones culturales.

12) La participación nesti concursu implica l'aceutación de toes y caúna de les bases.