Europa

Xineru!

Dos selmanes en casa siempres sienten bien, volver coles piles el doble de cargaes. He de reconocer qu'a la de retomar el voluntariáu la sensación foi un tanto estraña pero nada del otru mundu.

La segunda selmana d'esti mes un grupu de voluntarios entamaron un eventu deportivu ensin precedentes: Winter Games 2018, en Banská Štiavnica (nun vos va sonar de nada pero ellí ñació Dežo Hoffman, famosu fotógrafu) 6 voluntaries y yo punximos camín de, el que tou eslovacu considera, unu de los pueblos mas preciosos d'Eslovaquia. Y nun mienten.

Trés hores de viaxe, dos trenes y un taxi, los paisaxes yeren de cuentu d'iviernu!

Los dos primeros díes fueron xeniales, conocimos el pueblu, xugamos h.oquei sobro un llagu conxeláu y tamién xugamos (con planches vieyes) Curling!

El tercer día desgraciadamente menquéme na pierna esquierda esmuciéndome dende una pequena llomba con trinéu. El médicu púnxome una inyección y encamentóme dos selmanes de reposu...y pa rematar, el día del nuesu regresu a Bratislava fui l'encargáu de pidir cuatro taxis pa dir hasta la estación de tren.

Nun falaben inglés y tuvi que faer usu del pocu eslovacu que sabía...bien, entendí que los taxis tardaríen venti minutos... pasaos esos minutos namá apaeció unu, llamé otra vegada y entendí que taben de camín los otros...faltaben 15 minutos pa que'l nuesu tren colara y nun había taxis. Un mozu, eslovacu, que tuviera con nós mientres l'eventu llamó pa entrugar: Lo que me dixeren yera que nun teníen cuatro taxis, solu unu que podría dir y volver pa toos nós. Diez minutos pal tren... recurrimos, cola ayuda del mozu eslovacu, al autostop y llogramos llegar al tren cuando faltaba un minutu pero namás lo consiguimos nós, los otros voluntarios perdieron el tren por culpa del mio eslovacu. Vueltes del destín cuando nun fales eslovacu del too.

Asina que nada, escríbovos dende la cama, al volver tuvi que tomar eses dos selmanes de descansu y equí voi siguir hasta'l próximu domingu.

Ahojte!