El CMX denuncia la "criminalización" de la mocedá

"El Conceyu pretende, por aciu la sanción y la persecución, criminalizar toa espresión xuvenil que nun s'afaiga al so modelu de ciudá sumisa y mercantilizada", llamenten.

El Conseyu de Mocedá de Xixón criticó güei l'arbitrariedá" cola que la Policía Local, obedeciendo ordes del gobiernu municipal, ta aplicando la Ordenanza de Convivencia Ciudadana, en concretu, la prohibición de consumir alcohol nes cais. El colectivu xuvenil denuncia'l doble vara de midir na aplicación de la política sancionadora. "Ente que nel Parque de Begoña tarde tres tarde padres beben sidra en plena zona de xuegos infantiles ensin qu'ello provoque presencia policial, les fines de selmana desenvuélvese una auténtica persecución policial a moces qu'actuando de la mesma manera que les persones adultes, acaben sancionaos".

El Conseyu considera que les práctiques de persecución y l'imposición de sanciones económiques que se tán aplicando de manera esclusiva a la mocedá de la ciudá formen parte de la política de criminalización que se ta llevando a cabu dende'l Gobiernu Municipal. "Yá non yá falamos de secuestrar y privatizar l'espaciu públicu, en manos d'hosteleros y demás negocios recreativos; una vegada tomada la cai, el Conceyu pretende, por aciu la sanción y la persecución, criminalizar toa espresión xuvenil que nun s'afaiga al so modelu de ciudá sumisa y mercantilizada".

Critiquen que mientres s'escuerre'l consumu d'alcohol en les cais, el Conceyu sigue promoviendo y financiando eventos hosteleros que tienen les bébores alcohóliques como'l so principal reclamu. "Nun s'entiende que tres el sitiu de Cimavilla, se promueva agora una fiesta de la sidra qu'instala pipes en plena cai". "Esisten propuestes alternatives a la estratexa represora del Conceyu enriba de la mesa. Dende'l Conseyu siguimos dispuestos a la interlocución", conclúi.