El CMX refuga el cambéu de la llei de l'albuertu promovida pol PP y la Conferencia Episcopal

Esixe al Gobiernu del PP la retirada d'esti proyectu de reforma y el caltenimientu del derechu de les muyeres a decidir sobre'l so propiu embaranzu.

El Conseyu de Mocedá de Xixón aprobó'l llunes nel Comité Executivu qu'axunta a les asociaciones que la formen un resolvimientu presentáu pola Asociación Mujeres Jóvenes de Asturias en defensa de la interrupción voluntaria del embaranzu y en refugu a la reforma pretendida pol gobiernu del PP y empobinao pola Conferencia Episcopal.

Opónense a la derogación de la Llei Orgánica 2/2010 de la Salú Sexual y Reproductiva y de la Interrupción Voluntaria del Embaranzu, al entender que supon un retrocesu nos derechos sexual y reproductivu de les muyeres, arrampuñando la llibertá d'éstes a decidir sobre'l so propiu embaranzu. El proyectu de reforma del Ministru de Justicia Alberto Ruiz-Gallardón supon una violación de la normativa europea ya internacional en materia de Derechos Humanos y desobedece les reclamaciones de la ONX de llegalizar el derechu al albuertu y de garantizalo como una prestación sanitaria gratuita. El Gobiernu del PP paez escaecer que la lexislación internacional nun se marca nel Vaticanu nin tien por xuez a nengún pretendíu "descendiente" de San Pedro.  

"La criminalización, persecución y penalización de la Interrupción Voluntaria del Embaranzu, llueñe de esaniciar la so práctica, promueve albuertos precarios y clandestinos, que ponen en peligru la vida de les muyeres, especialmente de les más nueves". Por tou ello, el CMX esixe al Gobiernu del PP la retirada d'esti proyectu de reforma y el caltenimientu del derechu de les muyeres a decidir sobre'l so propiu embaranzu, asegurando un albuertu llibre y gratuitu. "Apostar pol derechu a la vida ye apostar por una educación afeutivu-sexual enllantada en tolos niveles educativos y por una política de prevención d'embaranzos non deseyaos y de tresmisión d'enfermedaes sexuales que llegue a tola población nueva. Lo contrario ye emponer a les muyeres al albuertu clandestín".