Nuevas Generaciones reclama al gobiernu local "una solución inmediata" pa la espicha d'inxenieros

Acusen a Foro de "criminalizar a la mocedá" y de prohibir cualquier comportamientu rellacionáu col botellón pa "polarizar a la sociedá".

Nuevas Generaciones de Gijón caltuvo esta mañana una xunta cola comisión organizadora del viaxe d'estudios de la Escuela Politécnica d'Inxenieros (EPI) de Xixón, a cuenta de los problemes que tán teniendo pa la celebración de la tradicional espicha d'inxenieros. "Resulta indignante que'l Conceyu de Xixón nun dea nengún tipu de facilidá a estos mozos pa un eventu esencial pal financiamientu del so viaxe d'estudios".

Aseguren que'l gobiernu local ta poniendo "problemes" a la celebración d'esti eventu con distintes pegues que foi poniendo l'equipu de gobiernu de Foro pa retardar la decisión de cómo y ónde celebrar la espicha "col únicu motivu de dar patada escontra alantre al problema, hasta qu'a la fin la llegada de los exames torgue la so celebración".

Nuevas Generaciones esixe al equipu de gobiernu una solución inmediata pa "un eventu qu'apigura a mozos de toa Asturies, xenera importantes ingresos nel comerciu local y ayuda a estos mozos a sufragase un viaxe que llega tres más de cuatro años estudiando y respondiendo a les sos obligaciones".

Pregunten al Consistoriu si nun esisten razones muncho más fondes que los disturbios y acabamientu del moblame públicu, escaeciendo que son los alumnos de la EPI quien sufragen el gastu en seguridá, llimpieza y salú del mesmu. Consideren una irresponsabilidá que Foro "criminalice a la mocedá y prohibir cualquier comportamientu rellacionáu col botellón" pa "polarizar a la sociedá".