Les Mocedaes Socialistes de Xixón tilden de "oportunistes" a Nuevas Generaciones

Les Mocedaes Socialistes de Xixón amuésense ablucaes tres lo que consideren una nueva escenificación de "política-espectáculu", col pidimientu de les Nuevas Generaciones (NNGG) en sofitu de la tradicional espicha d'inxenieros, que lleva celebrándose al llargor de munchos años ensin incidencies destacables. "Tan engañando a tola mocedá xixonesa, manifestándose nos medios de comunicación a favor de la espicha, mentantu'l Grupu Municipal del PP contribuyó a l'aprobación de la ordenanza de convivencia impulsada por FORO y que criminaliza'l consumu d'alcohol na cai y alredeor d'equipamientos d'usu públicu o a menos de 50 metros de viviendes habitaes".

Aseguren tar dafechu a favor de que siga celebrándose la espicha d'inxenieros como "siempre se fizo": "Brindamos tol nuesu sofitu al alumnáu de la Politécnica coles sos reivindicaciones". Consideren "ridículu" que NNGG utilice como argumentu un supuestu beneficiu pa la economía llocal, "mentantu dende'l Conceyu Foro y PP dedicanse a amortizar delda colos bancos, en cuenta de dedicar recursos a amenorgar el gran paru xuvenil o a sofitar a los cientos de comerciantes que zarraron los sos negocios dende que gobierna la derecha en Xixón".