El CMX entama un Serviciu de Vivienda Xoven

El Conseyu de Mocedá de Xixón (CMX) pon en marcha en marzu un Serviciu de Vivienda Xoven que busca ufiertar una atención integral en materia de vivienda pa moces. La dramática realidá llaboral que viven les persones nueves y les dificultaes nel accesu a la vivienda lleven al CMX a potenciar al traviés d'esti nuevu serviciu la información y l'asesoramientu en materia de vivienda, centrando l'esfuerzu en dar a conocer los recursos que les persones nueves tienen al so algame pa llograr emancipase.

El Serviciu cunta con una oficina na see del CMX, na que, de manera presencial, cualesquier mozu puede informase y recibir asesoramientu sobre ayudes al arriendu y la compra de vivienda, programes de promoción nel accesu a la vivienda según tolo rellacionao cola formalización de contratos y la lexislación nesta materia. Les consultes pueden tamién realizase al traviés del teléfonu, unviando un corréu a vivienda@cmx.es o por aciu la páxina web www.cmx.es.

A lo llargo del mes de marzu'l Conseyu va dir poniendo en marcha nueves iniciatives que van complementar el Serviciu, ente elles la edición d'un manual sobre emancipación xuvenil, charres y talleres sobre vivienda alternativa y una Bolsa de Vivienda pa Moces, na que la entidá va exercer como mediadora ente persones que quieran poner una vivienda n'arriendu y mozos demandantes de vivienda, poniéndoles en contactu y asesorándoles a la de formalizar el contratu.

Esti nuevu Serviciu ta financiáu pol Programa "Mocedá n'Acción" de la Unión Europea y cuenta cola participación del Conseyu de la Mocedá del Principáu d'Asturies, que les sos iniciatives en materia de vivienda van ser desenvueltes pol CMX al traviés d'esti serviciu.