IX sofita la posición del CMX y pide esplicaciones sobre"l futuru de la Empresa de Vivienda

"Ye pergrave non solo que refugue dar esplicaciones a los representantes de la ciudadanía nel Plenu sinón que se niegue tamién a tratar l'asuntu colos mesmos directivos de la empresa".

El conceyal d'IX-LV Francisco Santianes cargó esta mañana contra la concejala d'Urbanismu y presidenta de Emvisl, Lucía García, por negase a convocar el conseyu d'alministración d'esta empresa pública magar el pidimientu del Conseyu de la Mocedá.

Magar la potestá pa convocar dichu conseyu ye de la presidenta o d'un terciu de los sos miembros, Santianes considera que l'alcuerdu de zarru de Emvisl ye motivu más que suficiente pa celebrar una xunta esplicativa. "La primera comenenciuda en dar esplicaciones sobre'l procesu de disolución de Emvisl tendría de ser ella mesma", dixo .

"Ye pergrave non solo que refugue dar esplicaciones a los representantes de la ciudadanía nel Plenu sinón que se niegue tamién a tratar l'asuntu colos mesmos directivos de la empresa", sostien el conceyal d'IX-LV. Pa Santianes "en bona lóxica democrática, cuantes más persones conozan y opinen sobre una tema d'esi caláu, más lexítima va ser la decisión. Nin tien sentíu nin sería llegal que Lucía García decretara pola so cuenta'l zarru de Emvisl".

Dende IX-LV especulen sobre los motivos que lleven a Foro a negase a dar explicación ante los distintos órganos. "O bien nun tienen nin idea de lo que quieren faer en realidá coles empreses municipales, o bien tán tratando l'asuntu con absoluta frivolidá y falta de sentíu democráticu", afirma Santianes.

N'opinión del conceyal d'IX-LV, "resulta perfectamente comprensible que los colectivos ciudadanos como'l Conseyu amuésense esmolecíos pol futuru de Emvisl. Lo estraño sería que nun lo tuvieren". Por eso, considera "fayadizu y pertinente" que reclamen la convocatoria del so conseyu d'alministración pa percanciar tola información que sía precisu.