El CMX refuga'l pieslle de la Empresa Municipal de la Vivienda

Javier Suárez considera que la decisión va suponer "la desapaición de les polítiques de vivienda".

El Conseyu de Mocedá de Xixón (CMX) refuga l'alcuerdu de reestructuración d'empreses municipales apautada por Foro y PP y que va supone la desapaición de la Empresa Municipal de la Vivienda (EMVISA). El presidente de l'asociación xuvenil, Javier Suárez, considera la decisión de "difícil xustificación" y encamienta a la conceyala Lucía García a convocar un Conseyu d'Alministración -del que forma parte el CMX- nel que dea cuenta detallada del alcuerdu al que llegó col PP "de manera unillateral y con una absoluta falta de tresparencia".

Suárez acusa a los partíos gobernantes d'entender la vivienda como un negociu y non como un derechu y la política de vivienda como meru asistencialismo. Recuerda qu'EMVISA ye una empresa "barata y eficiente, que desenvuelve'l serviciu públicu municipal meyor valoráu poles y los ciudadanos de Xixón".

Considera que'l pieslle nun va suponer un gran aforru, magar que "la única diferencia que plantegen de gastu ye la plaza d'un xerente y el gastu de lluz de la see, propiedá municipal". Por ello, tarrez que l'aforru buscáu venga pela vía de la eliminación de programes y servicios, lo que na práctica supondría "la desapaición de les polítiques de vivienda nuna ciudá que siempres tuvo la promoción del accesu a una vivienda como oxetivu fundamental de l'acción municipal". 

Suárez denuncia la incertidume de los trabayadores, que tuvieron qu'enterase pola prensa del zarru del so centru de trabayu. Refuga que la decisión nun pasara pol Conseyu d'Alministración de la empresa nin pol Plenu Municipal, señal d'una forma "bien particular d'entender la democracia".