L'asturianismu que vien: una visión de futuru

L'asturianismu na actualidá ta nun planu cultural mui activu pero, al mesmu tiempu, les circunstancies polítiques tán condicionándolu. Esti ye un momentu en que los primeros neños que foron a clas de Llingua Asturiana son agora adultos y tán na Universidá o buscando'l so primer trabayu y ellos son el futuru del asturianismu que vien. Ente les cuestiones que van condicionar a les xeneraciones nueves del asturianismu van tar la normalización llingüística, l'interés real por esti movimientu ente la sociedá, la capacidá de lideratu... Amás, nun hai qu'escaecer la fragmentación de los partíos políticos que se vien dando n'Asturies, sobre manera na esquierda asturianista.

Esti selmanariu axuntó nun debate a dellos militantes asturianistes pa poner enriba la mesa dalgunes d'estes cuestiones. Hai que dicir que, anque taben convidaos a participar nel debate la estaya de mocedá del Bloque por Asturies y la organización Darréu, finalmente nun pudieron asistir.

-¿Interesa realmente l'asturianismu a la mocedá?
-Inaciu GalÁn, militante de Xuventú Asturianista. Parezme qu'hai una minoría a la que sí-y interesa, pero depués, lo que ye llegar al gran públicu, l'asturianismu a pocos ámbitos llega. Y, nesti casu, nun creo que sía ún d'ellos.
-Ángel González, Unidá Nacionalista Asturiana Mocedá. Yo toi d'alcuerdu colo qu'apunta'l compañeru. Parezme que poco a poco l'asturianismu ta sacando la cabeza ente la mocedá y cada vez tán faciéndose más coses, pero tovía pue facer más y esa ye la cuestión más importante.
-Iyán González, Fai! Teniendo en cuenta que l'asturianismu en sí ye una cosa mui etérea, que va dende l'ámbitu musical, folclóricu... al estrictamente llingüísticu y, n'últimu pasu, a la vertiente más política. Parezme que nesi abanicu sí que podemos falar de qu'hai un interés, sobre manera no que tien que ver col tema musical. Hai que tener en cuenta tamién qu'añu tres d'añu matricúlense en clas de Llingua Asturiana más de 20.000 alumnos. Al final, parezme qu'hai una visibilización social en cuantes a qu'hai un ciertu movimientu. Anque, evidentemente, nun ye tolo grande que quixéremos.