Cristina Ferrández Box y Lucía Rivero Rodríguez ganen la X edición del Premiu Astralgal

El X Premiu Astragal, qu'organiza l'Institutu Asturianu de la Xuventú en collaboración col Conceyu de Mocedá de Xixón, foi a parar anguaño a Cristina Ferrández Box y Lucía Rivero Rodríguez, por dos proyectos artísticos que van poder vese, nel Espaciu Astragal de Xixón, ente l'últimu trimestre del 2009 y principios del 2010. Cada gallardonada va recibir 6.500 euros de premiu, colos que van tener que producir los proyectos que se presentaron nel concursu y editar los catálogos.

Cristina Ferrández, xoven artista alicantina (1974) asitiada n'Asturies, presentó un proyectu tituláu "Güertos urbanos", mentes que'l de la xixonesa Lucía Rodríguez (1984) lleva por títulu "El Perru románticu".

El Premiu Astragal, que ta incluíu na convocatoria anual del Institutu Asturianu de la Xuventú baxo la denominación xenérica Culturaquí, ta concebíu para dar cabida a proyectos artísticos ideaos específicamente pala Sala d'Esposiciones del Conceyu de Mocedá de Xixón y la so interacción cola ciudad onde ta asitiada. A esta edición concurrió un total d'ocho proyectos artísticos.

El xuráu, nel que figuraben Pilar Lafita, Rosina Gómez-Baeza, Ignacio Quesada Alonso y Jaime Luis Martín, esbilló los dos proyectos premiaos pola calidá artística espositiva, pola claridá de proyección y la viabilidá de la execución.