El Conseyu de la Mocedá avera la cultura asturiana a mozos alemanes dientro d'un programa européu d'hermanamientu

Un grupu de 15 mozos alemanes participantes nel programa 'Nuremberg' van conocer los próximos díes la cultura y xeografía xixonesa y asturiana de la mano del Conseyu de la Mocedá de Xixón nel marcu d'un programa européu d'hermanamientu 'Juventud en acción', según indicó en rueda prensa'l presidente del órganu, Jordán Suárez.

  Suárez, que participó na receición ofrecida pola conceyal d'Emplegu, Igualdá y Mocedá del Ayuntamientu de Xixón, Begoña Fernández, al grupu de mozos de la Federación Deportiva de Baviera (Alemaña), resaltó la necesidá de que les asociaciones moces sigan trabayando nesa llinia de conocencia y hermanamientu, dao que considera que ye "onde ta'l futuru d'Europa y de los sos habitantes".

  El presidente del Conseyu explicó que tán en Xixón pa participar na xeneración d'esi conceutu de 'ciudadanía europea' que promueve'l programa de la UE. Amás, Suárez señaló que los proyeutos presentaos pol Conseyu nel 2008 algamaron incrementar les presiviones presupuestaries y van permitir la realización de programes procedentes de Turquía, Italia, Hungría y Lituania. Pela so parte, Begoña Fernández resaltó la importancia d'estos alcuentros pa "texer llazos d'amistá con otres ciudaes".

  La Federación Deportiva de Baviera, cuenta con más de 11.000 clubes y más de 1,5 millones de socios y ta integrada nel Conseyu de Mocedá de Nuremberg. Los 15 mozos participantes nesti alcuentru van visitar a lo llargo d'esta selmana equipamientos deportivos y destinaos a la mocedá, asina como espacios culturales de la ciudá --Llaboral Ciudá de la Cultura y Muséu del Pueblu d'Asturies, ente otros-- pa conocer la cultura y xeografía propia d'Asturies, incluyida una escursión al Picu Mazucu, na sierra'l Cuera, en Llanes.