Europa

Un mes yá y tengo la sensación de que'l tiempu vuela gracies a que la ciudá ufre actividaes a esgaya pa que nun quedes en casa engancháu a dalguna serie.

Bien, setiembre foi un poco caóticu col tema entamar horarios, pero nada que nun se solucione con una bona xestión.
La ONG cola que trabayo ye Ulita (significa conchina o pequeñu abellugu)  déxovos l'enllaz a la so web por que lleais un poco sobre ellos, yo cuentu dende'l mio puntu de vista lo que faen.

Ulita ufierta a neños ente 4 y 25 años un pequeñu espaciu onde puedan esplayase sobre los sos problema o mieos, afayase nos sos raigaños y sentise arguyosos d'ellos, baillar, pintar, falar, cocinar o simplemente compañía.

 

                                                                                                       

Nos primeros díes simplemente dediquéme a reparar pol tema idioma. Yo, con traductor na mano, preguntába-yos si podía xugar con ellos y dempués de cinco o más minutos d'intentar pronunciar cinco consonantes siguíes y cara de nun sé qué tas diciendo, aceptaben. Nun me gusta'l fútbol y nunca xugué pero pa ellos ye'l meyor deporte del mundu, asina que nada, agora tolos llunes xuego al fútbol o dalgún otru deporte con una pelota.

Los martes tenemos dos clús, unu pa neños de 6 a 10 años qu'anguaño ta dedicáu al universu, y el segundu pa neños de 11 a 15 onde básicamente tratamos de faer realidá les sos lloques idees. El tema pa esti club ye cultura, asina que preparé una presentación sobre tradiciones, cultura y comida d'España y Colombia, y como-yos encanta cocinamos al rematar la presentacion, arepes y una tortilla de patates, la primera vegada que la faía y sorprendentemente salió bien (xuego cola ventaya de que nunca prebaron o vieron una, asina que... :-)
Los miércoles tán pa les xeres, yo entamé xugando xuegos de mesa n'inglés con dalgunos rapacinos pero al paecer dáseme bien y agora enseño a los más peques los númberos n'inglés.
Los xueves son pa los mayores, de 15 a 25 años, ye un pocu dici-yos que faigan lo que querais con respetu y ensin romper nada.

 

                                                                                                                  

Como namás trabayo con Ulita les tardes busqué otros sitios nos que precisaran un poco d'ayuda:

•  Residencia pa persones mayores, llunes y miércoles ayudo a que coman nel almuerzu y la xinta, falo colos que saben inglés y trato de faelo chapurriando alemán y eslovacu, ayudámoslos a dir a les sos actividaes y nel segundu vienres de cada mes entamamos una folixa temática.

Esti mes tocó los años 20, tou un ésitu: Decorar un poco'l salón, preparamos una presentación con datos interesantes y fiximos un xuegu de memoria con personaxes famosos, too esto con música de la dómina de fondu. Al final Elena y yo tratamos de baillar el míticu Charleston

• Residencia pa persones con movilidaá amenorgada, vienres nos qu'ayudo a que coman nel almuerzu, ayudo na terapia con música y xugamos la versión eslovaca del parchís: človeče, nehnevaj sa (nun t'enfades amigu)

• YMCA Building, los xueves ayudaré con trabayos alministrativos y "social media manager"

Esti edificiu construyíu en 1923, solía ser un centru cultural pero espropióse demientres el gobiernu comunista y usáu como un pequeñu hostal, cine y dellos chigres. Güei día hai 3 chigres, l'hostal y l'espaciu más grande d'Eslovaquia pa conciertos. YMCA recuperó la propiedá fai 2 años y quieren convertir l'espaciu no que solía ser, asina que tartare de ayudar un pocu.

Y eso ye un poco lo que fadré esti añu, que toi seguru que tará apináu de sorpreses.Peru non tou ye trabayu....Ochobre: mes de folixes, conciertos, cine y guíes.

 

Na segunda selmana, 5 voluntarios ufiertáronse a "faer de guía" per Bratislava pa un grupu que taba realizando un Training Curse All For Inclusion. Por cada voluntariu yera un grupu de 5 persones, teníamos que llevalos a visitar 2 ONGs, enseñándo-yos un poco la ciudá y dempués cena con tolos grupos.
Col mio grupu dempués de les visites, percorrimos les tiendes de souvenirs y los chigres con cerveza artesanal eslovaco. Na cena siguimos cola nuesa preba de cerveces...ye la unica manera d'evitar el fríu. Decidí prebar el Chren (rabanu picante) pensando que yera dalgún tipu de puré de patates pero yera namás el color...aquellu yera como'l wasabi con tastu a menta, fíxome llorar :D y asina munches mas díes.

Pudi ver esti mes en directo a unu de los mios cantantes preferíos y de bladre! Gracies a que Fink actuaba nel espaciu más grande pa conciertos d'Eslovaquia ;D Tamién lo pasé perbién  nun conciertu de Kalascima.
pasamos pel FFi (Festival de Cine LGBT) y afayamos unu de los hidden bars de la ciudá. Decoración de los años 30 y cócteles con nomes redundantes.

hasta'l siguiente blogue, čaute!!